حياتنا كلها ابواب مع خربشة قلم اسماعيل محمد
حياة كل واحد فينا عبارة عن ابواب كتير متوزعة في حياته… وكل يوم بنمد ايدينا نفتح باب من الأبواب دي… ساعات بتكون ابواب فرح.. وساعات ابواب وجع… ممكن تكون ابواب امل… وممكن تكون ابواب تخرج منها هربان من يأس واكياس رمل مربوطة في رجلك… كل اللي ممكن تعمله هو انك تتصنت من ورا الابواب… جايز تستنتج او تستشف… غير كدة… ما تعرفش… لما بنمد ايدنا ونفتح الباب… محدش بيبقى عارف وراه ايه… فيه ناس بتقف قصاد الابواب بالسنين خايفة تفتحها… وتضيع حياتها في الانتظار… وفيه ناس بتمد ايدها تفتح الابواب بدون تردد… واحيانا بتفتح على نفسها باب من ابواب الريح اللي بيقولوا لك عنه”سده واستريح” مهما عشت… هتفضل تفتح في ابواب وهتفضل كل مرة مستني تعرف ايه اللي هتحدفه عليك… وانت ما تملكش من امرك الا انك تمد ايدك عشان بس تفتح او تقفله…
