الحكايه في كلمتين … مع خربشة قلم اسماعيل محمد

مش حاجه حلوه ابدا ان يكون قلبك جامد ومشاعرك ميته…… مش حاجه حلوه انك تكون إنسان قاسي وتتصرف بطريقة تأذي وتجرح الناس اللي حواليك .. وان كلامك يكون زي الرصاص….. مش حاجه حلوه ابدا إنك تكون بخيل في احساسك وبخيل في كلامك الحلو اللي ممكن تجبر بيه خاطر حد….. مش حاجه حلوه ابدا لما تكون انسان بياع .. سهل عليك تفارق اي حد .. مش حاجه حلوه ابدا انك تكون ناكر للجميل .. تنسي الافعال الحلوة ووقفة الناس جنبك وتفتكر الوحش بس .. مش حاجه حلوه انك تكون زي الحجر لا بتحس ولا بيفرق معاك حزن الناس ووجعهم … مش حاجه حلوه ابدا انك تكون انسان اناني كل همك نفسك وبس .. كل دي صفات مش حلوه اطلاقا عشان الاقي ناس بتتباهي بيها .. انتو دماغكم فين !! ومبسوطين بإيه !! دي صفات اسوء مايكون انها تكون موجوده في اي بني ادم .. هي لو موجوده ماينفعش نقول عليه بني ادم من الاساس .. لان البني ادم اللي بجد هو اللي بيحس بغيره .. وبيقدر ظروف الناس وبيزعل عشانهم .. البني ادم اللي بجد هو اللي قلبه لين ولسانه طيب مايقولش غير الكلام اللي يجبر الخاطر ويفرح القلب .. خليكم بني آدمين .. بلاش تبقو حجارة أو اشباه بني آدمين .. لان الحياة بقت مليانة قسوة ووجع فوق طاقة البشر