محمود ريان.. يكتب : الى امى إلى اختى

إلى مراتى
إلى كل ستات مصر
علمي بنتك تبقى ست بيت كويسة وتكون زوجة قبل كل شئ.
وبلاش والله تقوليلها انتى كنتى تستاهلى سيد سيده

_ علميها معنى التودد للزوج والحب والمودة.

_ علميها إن زوجها رقم واحد في حياتها قبل أبوها وامها مع حفظ حق البر بهما .

_ علميها ان زوجها ده أهم وأغلى حاجة في حياتها وإنها لازم تحافظ عليه.

_ علميها يعني إيه طاعة زوج وإنها تسمع كلامه طالما في المعروف. ( إذا أمرها أطاعته) إلا طبعا فيما يغضب الله. 👌

_ علميها انها تكون هينة لينة سهلة مطيعة رقيقة حنينة.
_ علميها إزاي تصاحب جوزها وتكون صديقة له قبل أن تكون زوجة.

_ علميها إزاي تعمل أكل كويس
ازى تطبخ
ازى تنظف بيتها
ازى تنظف ولادها
.. اه هي دكتورة او مهندسة او او او او او
… على راسنا من فوق ولكن الراجل عاوز ياكل في بيته أكله حلوة ويلبس لبسة نضيفة
وإلا كان قعد عند أمه أحسن..
كانت بتأكله وتعمله كل حاجة بلا مقابل وبلا ضجر.

_ علميها إن بيتها هو مملكتها وانه هو الاساس مش بيت أبوها
ومش كل شوية تنط عندك وتسيب بيت جوزها.

_ علميها لما يحصل بينهم مشكلة ان عمرها ما تسيب بيتها وتمشي وتقعد تحل مشكلتها في بيتها.

_ علميها انها تحافظ على اسرار بيتها وجوزها حتى عنك وعن أقرب الناس ليها وإن البيوت أسرار.

_ علميها ان امه لها حق عليها من باب البر بزوجها وليس واجب وان إللي هتعمليه مع حماتك سواء خير أو شر هيترد ليكي. فقدمي لنفسك.

_ علميها إنها عمرها ما تخير جوزها يا إما أنا يا أمك.
يا اما انا يا اما اختك
يا اما انا يا اما اخواتك
اختيار صعب جدا. لو هو بار بأهله هيختارهم ولو هو راجل خيخة هيختارها ويبيع أهله !

_ علميها الرضا بالموجود وعدم الشكوى من حالها وانها تعيش على قد حال جوزها.

_ علميها تبقى قنوعة وترضى بما قسمه الله لها وانها متبصش لصحباتها كل واحد ربنا أدرى بحاله .

_ علميها إزاي تكون زوجة صالحة وان زوجها هو جنتها ونارها.

_ علميها ان الجواز مش لعبة ولا تهريج! ولا تجربة وخلاص.

_ علميها ان فيه آخرة وموت ولازم يكون ليهم هدف وان الحياة مش أكل وشرب ولهو وخلاص.

_ علمي بنتك ازاي تكسب حماتها من أول يوم
، مش ازاي تعاديها وملكيش دعوة بيها
! وتقوليلها دى انتى مهما عملتى مش هتحبك وهتغير منك علشان اخدتى ابنها
هو انتى ياحاجه معندكيش ابن ؟

_ علميها انها تعاملها زي ما تحبي مرات ابنك تعاملك.

_ علميها تحترم الصغير قبل الكبير علشان يقولوا يسلم البيت اللي طلعت منه.
ويسلم البيت اللى ربا

_ علموهم كيف يبنون بيوتا مش تشجعوهم على خراب ودمار البيوت

        أسأل الله العظيم أن يصلح أحوالنا وبيوتنا