مشاعر وحكايات هتتعلم كتير أوى مع خربشة قلم إسماعيل محمد
وإنت بتكبر كده والحياة بتلطش فيك يمين وشمال هتتعلم كتير اوي.. هتتعلم إن مش كل حاجة حلوه لازم تدوم… هتتعلم إن في ناس هتكون مراحل في حياتك هتيجي لغرض يعلمه الله وهتمشي ..هتتعلم مين إللي تبكي على كتفه وهتتعلم إن ساعات لازم تمسح دموعك بإيدك انت وبس!!
هتتعلم تحب وهتتعلم تفارق وتفقد جزء من روحك وتكمل.. هتتعلم من الناس إللي جرحتك وخذلتك ….
وهتشوف الدنيا وهي بتدور وتعلمك إن الشيء الوحيد الأكيد إن مفيش حال بيدوم !!
هتتعلم يعني إيه ثقة ويعني إيه جدعنه واصول والدروس دي هتتعلمها من الخاين والندل وقليل الاصل قبل الصاحب الجدع ابن الاصول.. هتتعلم إنك تعيش بشوية تشوهات جوا نفسك بس عادي ،مش عادي !! كله خير.
هتتعلم إنك لسه قدامك كتير ولازم تفضل تربي نفسك..وكل ما تتعلم ، هتدرك إنك أمام علم الله قليل جدًا !!
هتتعلم إن في ناس في حياتك مينفعش تسيبها لازم تتبت فيهم بإيدك وسنانك علشان الناس دي مبتتعوضش..وهتتعلم إنك ساعات لازم تفسح الطريق للي عايز يمشي..وإنت قلبك راضي وماشي في سكتك !!
هتتعلم من الأحياء وهتتعلم من الأموات..هتتعلم من العالم وهتتعلم من الجاهل..هتتعلم من راجل مسن وهتتعلم من طفل صغير…هتتعلم من تجارب إللي حواليك ولكن هتتعلم أكتر في نفسك..
ومن أكبر الحاجات اللي لازم تتعلمها إنك تسامح نفسك وتسامح إللي حواليك..وتتعلم إن أكبر كنز لك هي أعمالك الخالصة لله..وإن كان اتكتب عليك تعافر..ف ربنا يكتب لك إنك تعافر في السكة الصح ومع الناس الصح وعلشان الهدف الصح !!
