مشوار حياتك شبه القطار هيقف بيك في محطات مهمه جدا عيش مع خربشة قلم إسماعيل محمد

لازم تعرف وتكون واثق ومتاكد ان مشوار حياتك هتمشيه هتمشيه ..خلينا متفقين علي القاعده ده علشان نقدر ناخد وندي مع بعض في الكلام ..ايوه عافيه ..ذوق ..رضيت ولا مرتضتش …هتمشي المشوار لانه مقدر ومكتوب بالدقيقه والثانيه …فخليك راضي ومطمن واثق في ربنا ومفوض امرك للي خلقك عارف انا بقولك كده ليه ..علشان مشوار حياتك شبه القطار هيقف بيك في محطات مهمه جدا ….يعني مثلا عندك محطه الصبر …وانت وحظك بقي …الصبر علي ايه …علي مرض ….ولا ابتلاء ….ولا …ولا ….وارجع افكرك انك لازم تصبر وترضي لانه قدر ومكتوب ومشوار حياه وعندك محطه السعاده …واللي فيها الفرح والرضا والعوض وجبر الخاطر …تقدر تسميها محطه الطبطبه …وده. بقي متعددش ممكن عوض في ابن ولا بنت صالح ….رزق …صحه كتير …نعم لا حصر لها ..وعندك محطه مهمه جدا …محطه الفراق والوجع …وده كمان انواع …فراق ووجع الموت …او خساره حد غالي ….وده بنسميها محطه الحقيقه …لان الموت حق …والبعد والخساره رغم الوجع بتعلم وتقوي …كل محطه القطار بيقف عندها …ليك فيها وعليك …هتاخد نصيبك اللي مكتوب …اي ان كان فرح او حزن نصيبك احمد واشكر وارضي هتفرق كتير …لان عدم الرضا مش هيفيد ولا هيغير شي غير انه هيصعب عليك المحطه اللي انت واقف فيها وهيطول عليك المده ومش بعيد تخسر نعم تانيه كانت في ايديك خدها مني نصيحه …ارضي بمشوار حياتك بمره قبل حلوه وقول الحمد لله وركز في الخير وجبر الخواطر …وقول ياااارب يهون المشوار ويكتر محطات الفرح والخير يااااارب